LABORATORIO TEATRAL DE VEDRA ou LTV
NOME DA ENTIDADE Vedramáticos TÍTULO DO PROXECTO Laboratorio Teatral de Vedra PÁXINA FACEBOOK www.facebook.com/vedramaticos CONTACTO vedramaticos@gmail.com
DESCRICIÓN
DO PROXECTO:
O Laboratorio Teatral de Vedra (LTV) concíbese como un proxecto cuxa finalidade é que mozos e mozas do concello de Vedra e outros municipios da contorna interesados no mundo das artes escénicas e sen experiencia teatral previa poidan achegarse ao xogo dramático e adquirir coñecementos básicos sobre os diferentes elementos que compoñen una representación teatral.
Con este obxectivo, durante dúas fins de semana desenvólvense un total de 6 obradoiros (Distensión; Expresión corporal e voz; Texto e interpretación; Vestiario, maquillaxe e atrezo; Medios técnicos: iluminación e son; e Montaxe e posta en escena) que pretenden ofrecer aos participantes unha aproximación ao teatro como proceso integral.
O LTV está dirixido a un máximo de 30 alumnos con idades comprendidas entre os 12 e os 35 anos que se distribúen en grupos de traballo de 7-8 persoas co fin de potenciar a participación e garantir unha mellor atención por parte dos docentes. Como práctica final, cada grupo realiza unha breve representación teatral cunha duración aproximada de 15 minutos, que estará aberta ao público xeral.
Finalmente, o proxecto quere contribuír a enriquecer a oferta cultural destinada á comunidade veciñal e a mellorar, así, a súa calidade de vida.
OBXECTIVOS
Achegar aos alumnos o coñecemento da experiencia teatral e os seus elementos principais.
Ofrecer á mocidade que habita na contorna rural alternativas culturais para o seu tempo de lecer e favorecer o seu desenvolvemento social.
METODOLOXÍA
O conxunto dos participantes realiza unha primeira sesión de distensión.
A continuación fórmanse 4 grupos de 7 persoas que rotarán polos distintos obradoiros.
Finalmente, os grupos traballan na creación dun breve espectáculo teatral.